35-солагии Истиқлолияти Ҷумҳурии Тоҷикистон

Истиқлолияти давлатии Ҷумҳурии Тоҷикистон, ки 9 сентябри соли 1991 эълон гардид, арзиши олии сиёсиву ҳуқуқӣ буда, заминаи ташаккули давлати соҳибихтиёр, демократӣ, ҳуқуқбунёд, дунявӣ ва иҷтимоиро фароҳам овард. Дар тӯли сию панҷ сол бо такя ба Конститутсияи Ҷумҳурии Тоҷикистон ва санадҳои меъёрии ҳуқуқӣ, пояҳои давлатдорӣ таҳким ёфта, низоми мақомоти давлатӣ такмил дода шуд.

Ҳокимияти судӣ ҳамчун шохаи мустақили ҳокимияти давлатӣ дар ҳифзи ҳуқуқу озодиҳои инсон ва шаҳрванд, таъмини волоияти қонун, адолати судӣ ва барқарорсозии ҳуқуқҳои вайроншуда нақши калидӣ дорад. Мутобиқи қонунгузории Ҷумҳурии Тоҷикистон, суд ҳангоми баррасии парвандаҳо принсипҳои қонуният, баробарии ҳама дар назди қонун ва суд, мустақилияти судяҳо, ошкоро будани мурофиаи судӣ ва эҳтироми шаъну шарафи инсонро роҳнамоӣ менамояд.

Дар даврони истиқлол ислоҳоти судӣ-ҳуқуқӣ марҳила ба марҳила амалӣ гардида, дастрасӣ ба адолати судӣ, такмили мурофиаҳои маданӣ, ҷиноятӣ ва иқтисодӣ, инчунин ҷорӣ намудани технологияҳои муосир вусъат ёфт. Ин тадбирҳо ба таҳкими эътимоди ҷомеа ба мақомоти судӣ ва ҳифзи манфиатҳои қонунии шаҳрвандон мусоидат менамоянд.

Ҷашни 35-солагии Истиқлолияти давлатӣ моро водор месозад, ки бо ҳисси баланди масъулият ба иҷрои вазифаи хизматӣ, риояи меъёрҳои ахлоқи касбӣ ва садоқат ба Конститутсия саҳмгузор бошем. Судя вазифадор аст, ки танҳо тибқи қонун ва виҷдони касбӣ қарор қабул намуда, адолати судиро таъмин намояд.

Бо итминон метавон гуфт, ки Тоҷикистони соҳибистиқлол бо такя ба ваҳдати миллӣ, суботи сиёсӣ ва волоияти қонун ба дастовардҳои боз ҳам назаррас ноил мегардад.

Судяи суди шаҳри Исфара:         Маликзода Н.Ғ.