РӮЗИ КОРМАНДОНИ МАҚОМОТИ СУДӢ

Рӯзи кормандони мақомоти судӣ яке аз санаҳои муҳим дар тақвими сиёсиву ҳуқуқии кишвари мост, ки ҳамчун рамзи эҳтиром ба заҳмату хизматҳои шабонарӯзии онҳое таҷлил мегардад, ки дар роҳи таҳкими адолат, ҳифзи қонуният ва таъмини ҳимояи ҳуқуқу озодиҳои шаҳрвандон саҳми арзанда мегузоранд. Ин рӯз на танҳо ҷашни як соҳа, балки ҷашни масъулият, адолат, поквиҷдонӣ ва садоқат ба Ватан мебошад.

Мақомоти судӣ дар низоми давлатӣ нақши меҳварӣ дошта, ҳамчун мақомоти мустақил адолати судиро татбиқ менамоянд ва қонуниятро дар ҷомеа ҳифз мекунанд. Дар шароити рушди босуръати равандҳои иҷтимоию иқтисодӣ ва технологӣ, масъулияти судяҳо ва кормандони дастгоҳи судҳо боз ҳам зиёд мегардад. Зеро ҳар як қарору ҳукми судӣ ба сарнавишти инсон, оила ва ҷомеа таъсири бузург мерасонад.

Аҳамияти ин рӯз дар он аст, ки ба воситаи он хизматҳои софдилона, кордонии касбӣ ва меҳнатдӯстии кормандони мақомоти судӣ арзёбӣ гардида, саҳми онҳо дар таҳкими давлати ҳуқуқбунёд ва ҷомеаи демократӣ боз ҳам намоёнтар мегардад. Барои мустаҳкам намудани пояҳои адолати судӣ, судяҳо ва кормандони дастгоҳи суд ҳамеша бояд ба меъёрҳои баланди ахлоқӣ, масъулиятшиносӣ, таҳаммулпазирӣ ва одилона амал намоянд.

Дар замони муосир яке аз вазифаҳои калидии судҳо баланд бардоштани дастрасии шаҳрвандон ба адолати судӣ, шаффофият ва истифодаи технологияи иттилоотӣ мебошад. Бо дастгирии роҳбарияти олии кишвар ва татбиқи ислоҳоти судӣ-ҳуқуқӣ, дар ин самт қадамҳои бузург гузошта шудаанд.

Бо ифтихор метавон гуфт, ки фаъолияти рӯзмарраи кормандони мақомоти судӣ танҳо иҷрои вазифаи хизматӣ набуда, балки рисолати иҷтимоӣ ва инсонпарварона мебошад. Ҳар як муроҷиати шаҳрванд, ҳар як парванда ва ҳар як қарори қабулгардида масъулияти сангини ахлоқӣ ва ҳуқуқиро талаб мекунад. Маҳз ҳамин масъулият аст, ки обрӯи мақомоти судиро дар чашми ҷомеа ва шаҳрвандон ташаккул медиҳад.

Бояд қайд кард, ки дар даврони соҳибистиқлолӣ низоми судӣ пайваста такмил ёфта, нақши он дар таҳкими давлати ҳуқуқбунёд ва адолатпарварӣ бештар гардидааст. Бо таъсиси заминаҳои ҳуқуқӣ ва институти судӣ, татбиқи барномаҳои ислоҳоти судӣ-ҳуқуқӣ ва боло бурдани нуфузу мақоми суд, эътимоди мардум ба мақомоти судӣ низ афзудааст.

Ҳамзамон рушди технологияҳои рақамӣ ва гузариш ба низоми электронии судӣ имкон медиҳад, ки мурофиаҳо шаффофтар, ҷавобгӯ ба талаботи замон ва фаҳмотар барои шаҳрвандон гарданд. Ин раванд, бешубҳа, ба баланд бардоштани сатҳи хизматрасонии иттилоотӣ ва саривақтии баррасии муроҷиатҳо мусоидат менамояд.

Бахусус, саҳми кормандони судҳои вилоятӣ, шаҳрӣ ва ноҳиявӣ дар иҷрои ин рисолат назаррас мебошад, зеро маҳз онҳо дар сатҳи аввал бо мардум рӯбарӯ гашта, адолатро ба зиндагии ҳаррӯзаи ҷомеа меоранд. Ин заҳмати шабонарӯзӣ ва садоқати воқеии хизматӣ сазовори қадрдонӣ ва дастгирист.

Дар ин рӯзи фархунда, ки ба рисолати адолат, инсондӯстӣ ва ҳифзи қонун бахшида шудааст, ба тамоми кормандони мақомоти судӣ — судяҳо, кормандони дастгоҳ ва ҳамаи онҳое, ки дар иҷрои вазифаи пурмасъулияти давлатӣ саҳм доранд, изҳори миннатдорӣ ва арзи сипос менамоем.

Бо итминон метавон гуфт, ки минбаъд низ мақомоти судӣ ҳамчун такягоҳи адолат ва пуштибони ҳуқуқу озодиҳои инсон дар самти пешбурди давлатдории муосир нақши муассир мебозанд.

Бо ин муносибат, ҳамаи кормандони мақомоти судиро бо иди касбиашон табрику муборакбод гуфта, ба ҳар яки онҳо барои ба амал баровардани адолати судӣ пеш аз ҳама саломатии бардавом, рӯзгори бобаракат, зиндагонии хушбахтона, пешравии кор ва муваффақиятҳои бештари хизматиро орзу менамоем.

Дар адои вазифаҳои пурмасъулияти хеш ҳамеша комрон бошед!

Судяи суди шаҳри Исфара:       Фарҳодзода Н.