АХБОРИ СУДӢ

Шаҳрванд А.Ш.Ҳ. зодаи шаҳри Исфара, Ҷамоати деҳоти Сурх санаи 13-уми  апрели соли 2025 соати 13:00 дар дохили яке аз нуқтаҳои фурӯши маркази тиҷоратии “Пайванд”-и шаҳри Исфара бо тоату ибодат  машғул шудааст.

А.Ш.Ҳ. бо моддаи  474 қисми 1 сархати 4 Кодекси ҳуқуқвайронкунии маъмурии Ҷумҳурии Тоҷикистон гунаҳкор дониста шуда, ба ӯ дар асоси ин модда ҷазо дар намуди ҷарима ба андозаи понздаҳ нишондиҳанда барои ҳисобҳо (баробар ба  1125 сомонӣ) ба фоидаи давлат таъин карда шуд.​​​​

* * *

Истиқоматкунандаи Ҷамоати деҳоти Чилгазӣ, шаҳрванд И.Қ.Ҳ. санаи 7 июни соли 2025 соати 12:00 дар манзили истиқоматиаш маъракаи тӯйи арусии фарзандаш И.Х.Қ.-ро бе иҷозатнома ва тавсияи мақоми ваколатдор — комиссияи доимии маҳаллӣ гузаронидааст, ки бархилофи талаботи  моддаи 18 қисми 1-и Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» ба ҳисоб меравад.

Дар рафти мурофиаи судӣ И.Қ.Ҳ. бо моддаи 481 қисми 1  Кодекси ҳуқуқвайронкунии маъмурии Ҷумҳурии Тоҷикистон гунаҳгор дониста шуда, ба ӯ ҷазои  ҷарима ба андозаи  даҳ нишондиҳанда барои ҳисобҳо (баробар ба  750 сомонӣ) ба фоидаи давлат таъин карда шуд.

* * *

4-уми  феврали соли 2025 истиқоматкунандаи Ҷамоати деҳоти Чоркӯҳ шаҳрванд С.Ҳ.И. дар манзили истиқоматиаш  ба муносибати аз ҳаҷи умра баргаштани модараш маъракаи ҳоҷиззиёратро гузаронидааст, ки бар хилофи талаботи моддаи 13 қисми 2-и Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» ба ҳисоб меравад.

Номбурда бо моддаи 481 қисми 5-и Кодекси ҳуқуқвайронкунии маъмурии Ҷумҳурии Тоҷикистон гунаҳгор дониста шуда, ба ӯ ҷазо дар намуди ҷарима ба андозаи сесад нишондиҳанда барои ҳисобҳо (баробар ба  22500  сомонӣ) ба фоидаи давлат таъин карда шуд.

* * *

Истиқоматкунандаи Ҷамоати  деҳоти   Ворух шаҳрванд К.Д.Д. моҳи июни соли 2025 дар манзили истиқоматиаш ба шаҳрванд А.С.С. ғайриқонунӣ таълимоти динӣ додааст.

Судшаванда К.Д.Д.  бо моддаи  474 иловаи 2  қисми 1  Кодекси ҳуқуқвайронкунии маъмурии Ҷумҳурии Тоҷикистон гунаҳкор дониста шуда, ба ӯ ҷазо дар намуди ҷарима ба андозаи навад (90) нишондиҳанда барои ҳисобҳо (баробар ба  6750  сомонӣ) ба фоидаи давлат таъин карда шуд.

М. АБДУЛЛОЗОДА,

муовини якуми раиси

суди шаҳри Исфара.